CAGAYAN DE ORO CITY-Nagtoo ang Integrated Bar of the Philippines o IBP Misamis Oriental- Cagayan de Oro Chapter nga adunay plano nga magdeklara’g nationwide martial law si Pres Rodrigo Duterte.
Kini bisan una nang gitin-aw ni Duterte nga walay lauman nga martial law sa iyang gibutyag nga radical change.
Matud ni IBP Misamis Oriental- Cagayan de Oro Chapter Pres Atty Eddie Cuaresma nga dili magkumpyansa ang katawhan sa pahayag ni Pres Duterte ilabina nga laban-bawi kini kung mag-desisyon.
Apan gitin-aw ni Cuaresma nga walay problema kon magdeklara’g nationwide martial law si Duterte.
Basta kay hangyo lang niini nga sundon lamang sa presidente sa nasud ang nalatid sa batakang balaod.
Una nang gihupay ni Pres Duterte ang kabalaka nga posibleng moresulta sa martial law ang bahad niya nga radical change.
Depensa niini nga maoy iyang ipasabot sa radical change mao ang pagbaton og opisina ubos sa iyang administrasyon nga maoy tigsulbad sa problema sa nasud.
