CAGAYAN DE ORO CITY – Ma-kuwestiyon ug angay lang buhaton ni kanhi Pres Rodrigo Duterte ngadto sa International Criminal Court ang iyang pagka-kasikop pinaagi sa International Police sa koordinasyon sa liderato ni Pres Bongbong Marcos tungod sa kasong crime against humanity mismo sa kauluhan sa miaging adlaw’ng Martes.
Kini ang reaksyon ni kanhi City Mayor Oscar Moreno kinsa law professor sa Xavier University kabahin sa pugsanong pagkuha sa ICC kang Duterte gikan sa Pilipinas aron ikustodiya sa ICC detention facility didto sa The Hague,Netherlands.
Miingon si Moreno nga daghan pa ang mga pangutana nga angay tubagon sa ICC sa isyu ni Duterte ilabina nga dili hiniusa ang hukom sa mga prosecutor sa lakang nga dakpon kini aron taralon sa pasangil batok kaniya.
Nabahin pag-ayo ang katawhan gumikan sa pagtugot sa Marcos administration nga dad-on sa ICC si Duterte taliwala sa daghang saad niini nga walay kooperasyon ang Pilipinas alang sa maong isyu.
Sa pikas bahin,dili angayang ikaguol na sa katawhan ilabina sa solidong mga tigpaluyo ni kanhi Pres Rodrigo Duterte nga siya gitugyan sa gobierno sa Pilipinas ngadto sa ICC.
Gipasabot ni kanhi IBP-Misamis Oriental chapter president Atty. Eddie Cuaresma nga pabiling inosente si Duterte batok sa pasangil nga iyang depensahan sa ICC chamber ug sigurado nga dili kini motugot nga molampos ang namasangil batok kaniya.
Siya miingon nga ikaayo kini sa matag-usa sa rason nga mahatagan sa kahigayunan ang mga panig nga nalambigit sa isyu sa extra judicial killings diin nagsilbing collateral damage ang suspected drug pushers sa Duterte administration.
