CAGAYAN DE ORO CITY – Nagtoo si Lesbian, Gay, Bisexual, Transgender and Queer o LGBT Pilipinas legal counsel Atty Sam Tan nga huyang ang gihuptang argumento ug mga ebedensiya sa mga reklamante batok sa kaso ni kanhi Pres Rodrigo Duterte sa International Criminal Court o ICC.
Miingon si Tan nga wala na gani nagsinabot ang numero sa ihap sa mga namatay sa giingong extra judicial killings nga gipamugos sa progresibong grupo nga 30-mil ka tawo.
Apan sa gibasa sa ICC judges sa pre-trial ni Duterte sa miaging semana,anaa lang kini sa 43 ka buok nga sobra kalayo sa gibalik-balik sa maong grupo atubangan sa media dinhi sa nasud.
Siya miingon nga kargo na kini sa prosekusyon kung unsaon nga molugwa sa ICC court nga ilang mapamatud-an nga ensakto ang pasangil niini batok Duterte.
Kini ilabina nga hatagan usab sa higayon maka-depensa si Duterte sa kaugalingon batok sa crime against humanity case nga iyang giatubang.
