Well-represented ug unified governance ang gustong makita ni Adrian Jay Espiritu sa IDEFEND Mindanao, alang sa mosunod nga mga administrasyon.
Gibutyag ni Espiritu, mas maayong ang mga magdumala sa nagkalain-laing posisyon sa gobyerno maggikan sa lain-laing sektor ug propesyon aron makita ang diversity sa liderato ug dili lamang magpundo sa usa ka political nga pamilya.
Siya miingon nga ang paghatag sa oportunidad sa nagkalain-laing indibidwal makapalig-on sa representasyon ug nakahatag sa mas lapad nga panan-aw sa pagdumala sa nasud.
Sa laing bahin, dili uyon si Espiritu nga mahimong succession ang pamaagi sa pag-ilis sa posisyon bisan pa kon mapasar ang Anti-Political Dynasty Bill.
Miingon kini nga kung maaprobahan ang maong balaod ug tugotan nga usa lamang ka miyembro sa pamilya ang makadagan sulod sa usa ka termino, kinahanglan adunay mga mekanismo aron mapugngan nga ang mosunod nga administrasyon maggikan gihapon sa maong political family.
Alang kaniya, wala gihapoy tinuod nga kausaban kon adunay balaod apan ang mopuli anak o kapamilya ra gihapon tungod sa impluwensya ug dungog nga nabilin sa miaging administrasyon. (James Oliver)
