Mikalas na sa 356 Lebanese ug mil-200 ang samaran sa mas gipakusog nga airstrike sa Israeli Defense Forces o IDF sa nagpadayong cross-border offensive batok Hezbollah militants sa Southern Lebanon.
Namahayag ang Lebanese Health Ministry nga punu na ang ilang mga pampublikong ospital sa mga milanding nga mga samaran.
Tungod sa opensiba sa IDF, suspendido ang tanang lebel sa klase gikan sa Habagatan padulong sa Capital City sa Beirut.
Naka-abot na ang impormasyon sa United Nations ug hugtanong gikondinar ni UN Secretary General Antonio Guterres ang hinimuan sa IDF.
Dugtong usab niini,namahayag si Stéphane Dujarric,spokesperson sa buhatan sa UN-Secretary-General nga gipa-aktibo na sa ilang konseho ang UN Special Coordinator for Lebanon ug ang UN Peacekeeping Force in Lebanon aron mutabang sa pag-aparta sa gubot nga sitwayon.
Una niini, gitin-aw sa gobyerno sa Lebanon nga dili representasyon ang grupong Hezbollah sa tibook nasud tungod kay may kaso pa ang maong grupo sa paglusad sa terror attack sulod sa ilang nasud.
Ang gobyerno dunay kaugalingong Lebanese Army nga padayong nakigbugno sa mga krimen nga hinimuan sa Hezbollah militants. Niadtong Marso 8, 2024, ang Hezbollah, miporma sa kowalisyon nga gilangkoban sa Free Patriotic Movement sa Mga Kristiano ug ang Amal Movement sa Shia Muslims.
Kini ang rason nga nakakuha’g duha ka parliamentary seat ang Hezbollah sa gobyerno sa Lebanon. (Bombo Anne Quileste).
