Gi-dakop ang igsoon sa hepe sa Shin Bet sa Israel nga si Bezalel Zini uban sa 14 pa ka kauban nga giingong sakop sa usa ka organisadong smuggling ring nga nagpasulod sa ilegal nga mga butang ngadto sa Gaza Strip.
Sumala sa imbestigasyon, si Zini giakusahan nga nagdala ug 14 ka kahon sa sigarilyo ug nakadawat sa bayad nga mokabat sa 365,000 shekels.
Ang uban pang sakop sa grupo giingong nagpasulod usab sa mga cellphone, piyesa sa sakyanan, ug lain-laing kontrabando pinaagi sa mga military convoy ug humanitarian aid nga gisulod sa Gaza.
Gipahayag sa mga awtoridad nga ang maong kalihokan nakatabang sa pagpangusog sa Hamas ug uban pang armadong grupo, nga naghatag og seryosong hulga sa seguridad sa Estado sa Israel.
Ang operasyon giila nga usa ka dakong eskandalo tungod kay nalambigit ang igsoon sa usa ka taas nga opisyal sa seguridad. Bisan pa niana, gipasiugda sa gobyerno nga walay ebidensya nga nagdugtong sa kaso ngadto sa iyang igsoon nga si David Zini, ang hepe sa Shin Bet. Ang mga otoridad nagpadayon sa mas lawom nga imbestigasyon aron masuta ang tibuok network sa smuggling ug ang posibleng koneksyon niini sa mga militante sa Gaza.
Gipakita sa kaso ang kahuyang sa sistema sa humanitarian aid ug military convoy nga posibleng magamit sa pagpanglimbong ug pagpanginabuhi sa ilegal nga paagi.
Kini nga panghitabo naghatag sa dakong kabalaka sa publiko ug nagduso sa gobyerno nga magpatuman og mas hugot nga regulasyon ug monitoring sa mga supply nga mosulod sa Gaza.
