CAGAYAN DE ORO CITY-Gikasuhan na sa kapolisan sa kasong illegal possession of explosives si Ozamiz City Diocese IFI Bishop Carlo Morales kuyog ang consultant sa National Democratic Front nga si Rommel Salinas sa piskalya sa Ozamiz City,Misamis Occidental.
Kini human nakuhaa’g hand grenade si Salinas sulod sa sakyanan ni Morales atol sa checkpoint sa Brgy Gango sa maong syudad sa miaging gabii.
Namahayag si Ozamiz City Police Office commander C/Insp Jovie Espenido nga wala sila makumbinser sa katarungan ni Morales nga napasakay lamang niini sa iyang sakyanan si Salinas bunga sa tawhanong konsiderasyon.
Si Salinas ang may kasong murder,frustrated murder,attempted murder,arson ug robbery atol sa iyang aktibong katuigan isip rebeldeng NPA sa Caraga Region.
Sa pikas bahin,moduso’g motion to quash ang legal counsel ni Morales sa oras nga itugyan na siya sa korte sa regular jail sa Ozamiz City,Misamis Occidental.
Kini human kabahin si Morales nga gikasuhan as illegal possesion of explosives diin walay gisitar nga piyansa sa balaod.
Namahayag si Pagadian City Diocese IFI Bishop Antonio Ablon nga imposible kang Morales nga nagbaton sa granada kay trabaho nila nga mga obispo ang pagsangyaw sa pulong sa Diyos ug dili pagsupak sa balaod.
Gikondenar usab sa IFI ang giingong illegal nga pagsikop sa militar ug kapolisan kang Morales.
Hinoon,gawasnon na ang kapikas ni Morales ug driver niini kay walay lig-ong ebedensiya nga magduot kanila.
Samtang atubangon sa PNP-10 kon ugaling ipaubos sila sa imbestigasyon tungod sa pagkasikop ni Morales.
Matud ni PNP regional spokesperson Supt Lemuel Gonda nga githado nila ang pagbatikos sa IFI ngadto kanila tungod lamang sa pagsikop kang Morales kuyog si Salinas.
