CAGAYAN DE ORO CITY – Nakatilaw sa pagsaway ang mga tigdumala sa mga nagsakit sa COVID-19 sulod sa mga isolation areas dinhi sa syudad.
Kini human walay pagduha-duha nga gi reklamo ni IFI Fr Chicoy del Puerto ang daw dili tawhanon nga pagtratar kanila pinaagi sa giingong dili maayong rasyon sa pagkaon samtang nagpa-alim sa COVID.
Wala ganahi si Chicoy sa kanunay mala nga pagkaon, sumo ug balik-balik ang klase sa menu nga girasyon kanila matag-adlaw.
Gusto unta sa pamilya sa pastor nga hatdan siya sa sinabaw nga sud-an apan nagkalisud kini sa pagpasulod sa iyang pagka-on sa istrikto sa isolation area.
Nagtoo ang pastor nga makapasamot sa ilang gibati ang dili maayong tratamento sa pagkaon ug mental health sa gisagubang nga COVID.
Samtang dili makapausab sa palisya sa hisgutanan sa rasyon sa pagkaon nga isulod sa nagkadaiyang city isolation units ug temporary treatment mngt facility ang pipila ka pagsaway gikan sa pipila ka pasyente sa bayrus nga giatiman sa dakbayan.
Kini ang tubag ni City Mayor Oscar Moreno nunot sa reklamo sa usa ka babaye ug bisan ni Del Puerto nga nagpabati sa pagka-dismaya kabahin sa rasyon sa pagkaon.
Nangayo’g pasaylo ang mayor nga limitado ang ilang mahatag tungod sa pagdaginot sa pondo kay wala pa’y kasiguruhan kon hangtod kanus-a mahuman ang COVID-19 pandemic nga miigo sa syudad.
