“Ignorance is not an excuse”—kini ang tin-aw nga pagsaway ni Cobbie Jan Canda sa Kabataan Partylist batok sa pahayag ni Davao City Mayor Baste Duterte nga wala kini nahibal-an nga nalambigit diay ang iyang igsoon nga si Vice President Sara Duterte sa mga kompanya nga nakakuha og kontrata sa gobyerno sa Davao.
Gitin-aw sa opisyal nga dili puyde nga himoong balibad aron makalikay sa pagpanubag sa balaod ang pag-ingon nga walay ideya kon kinsa ang mga tag-iya sa mga negosyong gihatagan og proyekto sa dakbayan.
Dugang pa ni Canda, daw gidula-dulaan ra ang kwarta sa publiko pinaagi sa paghatag sa mga proyekto sa Davao sa mga tawo nga duol ra gihapon sa pamilyang Duterte.
Tungod niini, gipamugos sa grupo nga bisan pa kon moingon ang mayor nga walay nahibal-an sa mga giingong transaksyon sa syudad, kinahanglan gihapon kini nga patubagon ug paninglan ubos sa balaod.
