CAGAYAN DE ORO CITY-Nadugangan na ang ihap sa mga bakwit sa lungsod ug pipila ka bahin sa Misamis Oriental. Kini human mag-landfall na ang Typhoon Basyang sa Cortes, Surigao del Sur.
Matud ni Abegail Malalis sa City Emergency Operation Center nga anaa na sa 608 ka mga indibidwal ang namakwit sa evacuation centers.
Una nang giawhag sa mga opisyal sa syudad ang mga residente nga mohikling ilabina kadtong mga nagpuyo sa flood ug landslide prone areas.
Samtang nakuyawan ang pipila ka mga residente sa lungsod sa Talisayan human paspas misaka ang tubig-baha sa ilang lugar.
Sumala ni Jestoni Ugat nga gibundakan sila sa makusog nga ulan hinungdan nga miabot na sa taga tuhod ang baha sa iyang gipuy-an.
Nabalaka si Ugat nga mas modako pa ang tubig unyang hapon ilabina nga wala pa makalabay sa Misamis Oriental si Bagyong Basyang.
Samtang dul-ag 600 na ka pasahero ang na-stranded sa pantalan sa isla sa Camiguin. Kini human gidid-an sa Philippine Coastguard ang mga barko nga mobyahe tungod kay anaa sa signal number 2 ang Misamis Oriental.
Matud ni PDRMMO-Camiguin head Jejomar Bollozos nga kabahin sa mga na-stranded ang mga turista nga mopauli balik sa ilang lugar ingon man kadtong mo-biyahe padulong sa isla.
Una nang gibutyag ni Bollozos nga nakasinati sila sa dili maayo nga panahon sa ilang lugar.
Sa pikas bahin,nanawagan ang lokal nga kagamhanan sa syudad sa mga residente nga ihatag ang ilang suporta sa mga naglangkob sa City Disaster Risk Reduction and Management Department.
Si City Administrator Teddy Sabugaa miingon nga masayang lang ang ilang 24-oras nga pagbantay sa dautang panahon alang sa kaluwasan sa tanan unya kulang sa kooperasyon ang mga residente.
Gusto ipaabot ni Sabugaa nga kinahanglang magpatoo ang mga residente ilabina sa panahon nga ila nang ideklara ang forced evacuation.
Una niini, paninguhaon ni Sabugaa nga ipadungog sa radyo ang tingog sa siren kun ugaling ipatuman na nila ang forced evacuation.
