MANILA – Nagsagunson na sa tulo ka bulan ang pagsaka sa ihap sa mga tawong walay trabaho sa Pilipinas.
Subay sa data gikan sa Philippine Statistics Authority gikan sa bulan sa Marso hangtud Mayo misaka pa sa 2.11 milyon ka tawo ang pakyas nga makakitag trabaho.
Gibutyag ni PSA National Statistician Claire Dennis Mapa nga misaka sa 4.1% ang pagtubo sa ihap sa mga tawong walay trabaho pag-abot sa Mayo ning tuiga itande sa 2.04 milyon ka tawo nga walay trabaho sa Abril.
Hinoon, mas gamay kini itandi sa 2.17 milyon o 4.3% nga walay trabaho sa Mayo 2023 o susamang period.
Pipila sa mga rason kung nganong walay trabaho ang 18 anyos pataas o pipila ka mga propesyonal mao ang job mismatch o kulang sa haum nga mga trabaho ang labor sector.
Samtang ang uban, anaa sa waiting period sa hiring process.(Bombo Anne Quileste)
