CAGAYAN DE ORO CITY – Napasaka na sa militar ang kasong pagsupak sa Republic Act 9851 o war crimes batok sa duha ka grupo sa CPP-NPA-NDF sa sala ni RTC Branch 25 Presiding Judge Arthur Abudiente sa syudad kagahapong adlawa.
Miingon si Bukidnon Provincial Prosecutor Rommel Alonto nga maoy ilang gikasuhan sa kasupakan sa International Humanitarian Law o IHL ang mga rebeldeng NPA nga sakop sa sub regional committee 1 and 2 ubos sa North Central Mindanao Regional committee.
Nagsumikad ang kaso dihang gi-harass sa grupo ang barangay tanod nga si Ramy Rommel Go Restauro diin gisunog pa nila ang unom ka sakyanan sa usa ka plantasyon sa palm oil sa Sitio Aurora sa Brgy Sto. Niño, Manolo Fortich Bukidnon niadtong bulan sa Mayo ning tuiga.
Dugang ni Alonto nga klaro nga kasupakan sa IHL ang gihimo sa mga rebelde hinungdang sila gikasuhan.
Samtang gikompirmar sa Dept of Justice o DoJ nga pinakaunang kasong kasupakan sa IHL ang napasaka sa militar batok sa NPA sa korte ning syudad. Kini human nakit-an sa prosecutors nga dunay basehan aron isaka sa korte ang kasong pagsupak sa war crimes batok sa NPA rebels.
Miingon si Regional State Prosecutor Merlynn Uy nga gipasaka nila ang kasong kriminal batok ang mga rebelde aron manubag sa sumbong nga giakusar sa militar.
Wala pa’y tubag ang CPP-NPA sa maong lakang sa militar.
Dugtong niini,gipanganti ni 403rd IB,Philippine Army commander Brig Gen Edgardo de Leon nga sunod nila kasuhan sa pagsupak sa International Human Rights Law o IHL ang mga tag-as nga lider sa CPP-NPA-NDF.
Siya miingon nga mipirma’g kasabutan si Dionesio Micabalo, Jose Maria Sison ingon man NDF members nga kabahin sa pagsunod sa IHL apan nag-una sila nga misupak niini.
Una nang gibutyag ni De Leon nga naila sa mga biktima ug testigo ang maong mga rebelde hinungdan nga ila kining gikasuhan.
Una usab niini,may mga nag-rally nga nagsaway sa mga hinangal nga binuhatan sa CPP-NPA samtang giduso sa piskalya ang kaso sa korte.
