CAGAYAN DE ORO CITY-Napatay sa kapolisan ang Tokhang surrenderee nga napaubos sa anti-illegal drug operation sa Brgy Agusan ning syudad kagabii.
Kini human giingong misukol ang suspek nga si Geovanni Nazareno,hingkod ang panuigon nga nagpuyo sa Brgy 35 ning dakbayan.
Gibutyag ni Puerto Police Station commander C/Insp Evan Vinias nga namusil ang suspek sa gika-transaction dihang nabantayan niini nga pulis ang miatubang kaniya.
Naigo sa duha ka pinusilan ang dughan sa suspek hinungdan sa kamatayon niini samtang gipadala sa ospital kagabii.
Nakuha gikan sa suspek ang kalibre 45 nga armas ug unom ka sachets sa gitoohang shabu.
Si Nazareno ang ikanapulo nga suspected pusher nga napatay sa mga pulis nunot sa gipakusog nga anti-illegal drug operation sa syudad.
Samtang gidepensa sa committee on police,fire and public safety sa konseho ang sunod-sunod nga kamatay sa suspected pushers sa syudad.
Kini human laing suspected shabu pusher ang napatay sa kapolisan samtang gihimo ang anti-illegal buy bust operation sa Brgy Agusan kagabii.
Miingon si Konsehal Romeo Calizo nga mas pabor kini nga mahipos ang mga suspek nga misukol sa kapolisan kay sa makahimo pa’g kadaot ngadto sa mga sibilyan.
Una niini,nasubo gihapon ang mga ospiyal sa syudad gumikan kay ang mga suspected pusher sama kang Nazareno ang biktima ra gihapon sa mga kalihukan sa sindikato sa gidiling droga sa nasud.
