CAGAYAN DE ORO CITY – Nagkinahanglan na lang sa usa ka daug ug ilhon nga kampeon sa laing higayon sa National Basketball Association o NBA ang Boston Celtics.
Kini human gikuptan na sa team ang tulo ka daug ug wala pa’y pildi dihang subli gipalukapa ang Dallas Mavericks bag-uhay lamang.
Nabantayan nga sa 4th quarter sa dula lang nakahimo’g arang-arang nga opensiba ang Dallas apan fouled out usab ang ilang star player nga si Luka Doncic rason nga sila gipildi sa Boston sa pinal nga iskor 106-99.
Nangulo sa ikatulong kadaugan sa Celtics sila Jayson Tatum ,31 puntos ug Jaylen Brown nga mitampo sa 30 puntos aron ibutang sa alanganin ang kapalaran sa Mavs.
Gipanguluhan usab ni Kyrie Irving sa iyang 35 puntos ang Mavs samtang sa wala pa na fouled out si Luka kini nagkupot usab sa 27 puntos.
Subay sa kasaysayan sa NBA,wala pa’y bisan usa ka team nga nakabangon sa 3-0 deficit.
Kon 4-0 sa Boston ang Mavs sa ilang game 4 sa adlaw’ng Sabado, kini na ang ika-18 nga kampeonato nga mahuptan nila sa NBA.
