(Update) CAGAYAN DE ORO CITY- Gihulat na lang sa Police Regional Office 10 ang paglugwa sa arrest warrant batok suspek pagpusil-patay sa 31 anyos nga babaye ug miangol sa kaubang menor de edad nga nakapaukay sa katawhan sa Brgy Tubigan,Initao,Misamis Oriental sa miaging Pebrero 16.
Matud ni PRO 10 regional director Brig Gen Christopher Abrahano nga subay sa pagsaysay sa menor de edad nga wala nakalinggawas sa kamatayon dihang giapil pagpusil,nasulti niini nga kaila nila ang suspek ug kini iladong politiko.
Apan gipugngan ni Abrahano nga hinganlan ang maong suspek hangtod dili pa molugwa ang mando sa korte nga dakpon kini ug mataral sa hukmanan.
Siya miingon nga politiko apan wala naggikan sa Northern Mindanao ang suspek nga mihimo sa kremin.
Dugang sa heneral nga personal ang motibo sa pagkahimo sa kremin subay sa mga pasiunang resultado sa imbestigasyon.
Napasa na sa kapolisan sa piskalya ang sumbong nga murder ug frustrated murder batok sa maong politiko ingon man kauban niini sa pagkahitabo sa kremin.
Hisayrang nahiagom sa pinusilan sa ulo ang 31 anyos nga si alyas Jhai-Jhai nga taga-Jasaan,Misamis Oriental dihang gibiyaan na lang kini daplin sa dalan sa Brgy Tubigan,Initao niadtong Pebrero 16 sa kadlawon.
