CAGAYAN DE ORO CITY – Mao na’y molingkod isip officer-in-charge nga kapitan ang first kagawad sa Brgy. San Miguel, Iligan City.
Kini human nabilanggo si Kapitan Joel Jumawan tungod sa kasong paglugos niini sa iyang brgy secretary sa maong syudad.
Gibutyag ni DILG-Iligan City Director Edward Bhagwani nga base sa nalatid sa balaod,hulipan sa first kagawad kon uganing mawala ang kapitan.
Giangkon ni Bhagwani nga adunay limitasyon ang gahom sa usa ka OIC apan dili kini makapugong sa pagtunol sa serbisyo sa katawhan sa brgy.
Samtang politika ang gitudlong hinungdan sa pagka-priso ni Jumawan.
Gibutyag ni Iligan City spokesperson Joe Pantoja nga nahimong init ang bangi sa politika ni Jumawan batok sa kaatbang niini sa milabayng brgy election.
Miingon si Pantoja nga angay atubangon na lamang ni Jumawan ang kaso niini gumikan kay anaa naman kini sa korte.
Dugtong niini,gihimakak ni Jumawan nga iyang gilugos ang 43-anyos nilang brgy secretary sa Iligan City.
Miingon Jumawan nga wala siya sukad nag-atubang ug dakong kaso gawas lamang niining gipasaka kaniya karon.
Malaumon ang maong Kapitan nga molutaw gihapon ang kamatuoran.
Hisayaran nga gidakop si Jumawan tungod sa gipalugwa sa korte nga warrant of arrest batok kaniya.
