CAGAYAN DE ORO CITY -Gisalig na lamang ni Iligan City Lone Dist. Rep. Frederick Siao sa Kongreso ang pagpatuman sa 90-day preventive suspension nga gipahamtang kaniya sa Sandiganbayan.
Kini may kalabutan sa reklamo batok kaniya sa giingong illegal nga pagpa-renta sa mga yuta sa gobyerno sa Iligan City.
Sa ekslusibong pakighinabi sa Bombo Radyo, gibutyag ni Siao nga mahibal-an sa Hulyo 22 kon unsa ang mahimong desisyon sa House of Representative sa iyang giatubang nga suspension.
Nagsumikad ang reklamo batok kang Siao tungod sa iyang pag-apil apil kang kanhi Iligan Mayor Lawrence Cruz nga lugwayan pa ang lease sa mga yuta sa lokal nga kagamhanan dihang konsehal pa siya sa lungsod nga wala miagi sa public bidding.
Nabulgar usab nga ang mga naka-kontrata sa pagrenta sa mga yuta nga gilangkuban sa Kiwalan Lumber Company ug Salvatori Development Corp. giingong konektado sa inahan ni Cruz.
Samtang gikompirmar ni DILG-10 Assistant Regional Director Edward Bhagwani nga dili una makalingkod isip kongresista si Siao sulod sa 90 ka adlaw.
Kini nunot sa iyang giatubang nga 90-day preventive suspension nga gipahamtang kaniya sa Sandiganbayan.
Apan, gitin-aw ni Bhagwani nga dili na moagi pa sa ilang buhatan ang suspension si Siao tungod kay ang Sandiganbayan maoy nagpahamtang niini.
Una nang gibutyag ni Iligan City Lone Dist. Rep. Frederick Siao nga iya na lamang gisalig sa Kongreso ang pagpatuman sa suspension nga iyang giatubang.
