CAGAYAN DE ORO CITY- Giawhag ni Iligan City Rep. Frederick Siao si Pres Rodrigo Duterte nga maoy mangunay pagpili sa sunod nga House Speaker sa Kongreso hulip kang outgoing House Speaker Pampanga Rep Gloria Macapagal-Arroyo.
Sa pakighinabi sa Bombo Radyo, gibutyag ni Siao nga upat ka kongresista ang naglaraw sa maong posisyon apan giangkon niini nga mapadulong kang Sen Alan Peter Cayetano sa Nacionalista Party ang ilang suporta.
Si Siao miingon nga mas maayo nga si Duterte ang magpili sa sunod nga mahimong House Speaker tungod kay segurado nga suportahan kini sa mayoriya sa mga kongresista.
Samtang nagtoo si Citizen Watch for Good Governance o CWGG convenor Atty. Antonio Soriano nga dili makaayo sa nasud kon mahimong House Speaker si Davao City Congressman elect Paolo Duterte.
Kini tungod kay ang mahimo lamang basehan sa mga congressman nga presidente ang amahan sa batan-ong Duterte.
Gihimo ni Soriano ang pahayag dihang una nga migawas ang pangalan ni Pulong nga ituboy sa kaubang mga kongresista aron mohulip kang outgoing House Speaker Gloria Macapagal Arroyo.
Matud ni Soriano nga dili maayo sa katawhan nga mahimong lider si Paolo tungod kay wala kini hanaw sa trabaho sa kongreso.
