CAGAYAN DE ORO CITY – Buhi ug dili tinood nga mikatag nga impormasyon nga gipusil-patay si Iligan City ABC president Kag Cesarve Siacor.
Kini ang pagtin-aw ni Iligan City Information Officer Joe Pantoja sa Bombo Radyo nunot sa report nga si Siacor ang gipusil sa maong lugar kagabii.
Miingon si Pantoja nga tinood nga may gipusil apan ang batan-ong si Oliver Sojetado samtang kini miduyog sa pag-vigil sa namatay’ng inahan ni Siacor.
Dugang ni Pantoja nga dead on the spot si Sojetado tungod sa igo sa ulo ug dughan gikan sa suspek nga misulod sa haya kagabii.Dili pa matumbok kon kinsa ang maong suspek kay paspas kining misibat pagkahuman sa kremin.
Samtang gipadali’g sulbad ni Iligan City Mayor Celso Regencia kang City Director Police Col Michael Pareja ang pagpusil-patay sa 20 anyos nga ulitawo kagabii.
Kini ilabina nga may nadawat nga death threats diay ang biktima nga si Oliver Sojetado nga giagi sa iyang facebook messenger.
Miingon si Pantoja nga sumala sa pamilya sa biktima nga wala kini kontra ug sukad negatibo sa paggamit sa ilegal nga droga.Nangayo’g hustisya ang pamilya sa gidangatan sa biktima.
