CAGAYAN DE ORO CITY – Gihimuan pa sa dugang imbestigasyon sa mga hingtungdang ahensiya ang nabulgar nga large scale illegal mining activities nga gidudahan nga hinimuan sa pipila ka mga opisyal sa gobierno nga nakabase sa bisinidad sa Cagayan de Oro City ug Misamis Oriental.
Kini human gikompirmar sa Mines and Geosciences Bureau/MGB Regio 10 ug Environmental Management Bureau/EMB 10 nga nakasuhan na nila ang usa ka Gilbert Obsioma nga taga-Brgy Pigsag-an ning syudad nga unang nadakpan sa hiniusang anti-illegal mining operation sa Brgy Nangcaon,Opol sa lalawigan ning semanaha lamang.
Saysay sa maong mga ahensiya nga kuyog sa National Bureau of Investigation 10,2nd Special Forces Company ubos sa 1st Special Forces Battalion, 403rd Brigade sa 4th Infantry Division of the Philippine Army napasayon ang pagsulod nila sa maong minahan diin nasapon nila ang dinakpan.
Sa gihimong imbestigasyon sa security govt forces,nabulgar nga usa ka aktibong opisyal sa brgy ang utok sa maong kalihukang-ilegal.
Hinoon,gipugngan manganlan kay gipaubos pa sa dugang imbestigasyon ang nabulgar nga mga impormasyon.
Gawas sa dinakpan,nakompiskar usab sa raiding team ang tulo ka hydraulic excavators, ten water pumps, multiple hoses, sluice mats,sluice boxes, wooden pan sako nga adunay sulod nga mga resibo ug transaction log.
Makita usab sa drone footage nga anaa sa 4.88-hectares ang nadamyos nga kayutaan nga milakip sa ubang bahin sa kalikupan.
Dumduman nga maoy giatubang sa dinakpan ang pagsupak sa theft of minerals sa Section 103 sa Republic Act No. 7942 ug kasupakan sa Water Code of the Philippines.
Sa pagkutlo ning balita,mga opisyal nang mitingog kabahin sa akusasyon apan pulos nanghimakak nga sila nalambigit sa nabulgar nga kalihukang ilegal.
Hisayrang sa miaging Hulyo,anaa sa pito ka Chinese nationals ang nadakpan sa PNP-Maritime Misamis Oriental sa Brgy Tuburan ning syudad ug pagsulod sa Agosto ning tuiga,laing unom ka trabahanteng Pinoy ang naharang sa CIDG-MisOr nga mipalusot sa dump truck nga kargado sa ore minerals gikan sa lungsod sa Opol. (DENR-MGB 10).
