CAGAYAN DE ORO ORO CITY – Wala na’y tugtan si Provincial Governor Juliette Uy nga makahimo’g bisan unsa nga illegal mining activities sa bisan asa nga bahin sa Misamis Oriental ubos sa iyang administrasyon.
Kini tungod kay gimando ni Uy nga himoon nang legal mining operations ang mga pagpanguha’g bulawan ug ubang minerales sa lalawigan partikular sa bukirang bahin sa lungsod sa Opol,Manticao ug ubang munisipyo nga aktibo ang kalihukan.
Miingon ang gobernadora nga mas maayong iagi sa legalidad ang operasyon sa pagpamulawan kay aron klaro nga pagbahin-bahin sa kinitaan nga padulong sa kapitolyo,munisipyo ug sa ubang ahensiya sa gobierno
Mas maayo kini itandi sa kalihukang illegal mining activities nga pipila lang ka tawo ang makapahimulos ilabina ang mga duol lang sa dughan sa mayor o ubang tag-as nga opisyal sa kagamhanan.
Gipasidan-an usab ni Uy ang ubang ahensiya sa gobierno nga walay tugtan nga makahimo’g mineral extractions kung walay pagtugot gikan sa kapitolyo-probinsyal.
Gipalanog kini nga mensahe ni Uy atol sa iyang inaugural speech nga gihimo sa tugkaran sa kapitolyo-probinsyal ning syudad sa kaganihang buntag.
Hisayrang dugay nang naglihok ang illegal mining activities sa pipila ka bahin sa lalawigan diin adunay mga langyaw nga minero ang nangunay paglusad sa mga kalut-kalot sa kabukiran.(Photos: PRO 10)
