CAGAYAN DE ORO CITY – Nasugaw ang mga kalihukang illegal mining sa bukirang bahin sa kabarangayan sa Tumpagon ug Pigsag-an ning syudad.
Kini human lusuba sa grupo ni City Local Environment and Natural Resources Office o CLENRO manager Engr. Armen Cuenca kuyog ang ubang Task Force Kinaiyahan ug nasudnong buhatan sa gobierno ang giingong illegal mining activities sa nahisgutang mga barangay.
Apan paghidangat sa monitoring ug inspection teams,wala na’y presensiya sa mga tawo nga nalambigit sa illegal mining activities.
Miingon si Cuenca nga walay ihatag nila nga higayon aron makaporma ang illegal miners sa pagguba sa kinaiyahan.
Kini tungod kay makalolooy ang kinaiyahan ug katawhan nga maoy mosinati sa dautang epekto sa pagmina-mina sa kabukiran.
Hisayrang kabahin sa gihataga’g proteksyon sa mga otoridad ang water shade area ug Iponan River nga sagad agi-an sa mga lubog nga katubigan gikan sa kabukiran.
