CAGAYAN DE ORO CITY-Kasuhan sa pagbaligya’g gidiling droga ug pagbaton sa ilegal nga armas ang nagpailang imam sa relihiyosong Islam sa piskalya sa syudad ning adlawa.
Kini human nasikop sa PDEA-10 inabagan sa PNP ang suspek nga si Hadji Rasol Noraida Sarip dihang gisilbi ang search warrant gikan sa korte sa Barra,Brgy Macabalan kagahapon sa buntag.
Miingon si PDEA regional director Wilkins Villanueva nga kapin sa tuig nila nga gipanid-an ang kalihukan ni Sarip diin siya gitumbok nga dakong shabu supplier ning syudad.
Nabawi kang Sarip ang 35 gramos nga shabu balor 175-mil;9mm pistol,dakong kantidad sa salapi ug mga alahas sulod sa iyang pinuy-anan kagahapong adlawa.
Samtang namalibad ang magtiayong Sarip nga nalambigit sila sa pagpamaliya’g gidiling droga sa syudad.
Kini sukwahi sa pasangil ni Villanueva batok sa maong magtiayong Maranao sa Brgy Macabalan ning syudad.
Miingon si Jayna nga bisan ug ikamatay pa sa tanang miembro sa ilang banay,dili mahitabo nga angkonon nila nga sila nagbaligya’g ilegal nga droga.
Namugos kini nga isip magsasangway sa mga pulong ni ‘Allah’ hugot nga gidili bisan na lamang ang paghawid sa sigarilyo.
