CAGAYAN DE ORO CITY-Gipaubos sa dugang imbestigar sa PDEA-10 ang pari sa pagtoong Islam nga nasikop sa search warrant operation diha sa Brgy Macabalan ning syudad kaganihang buntag.
Kini human gitumbok ni PDEA regional director Wilkins Villanueva nga high value target ang negosyante nga si Rasul Sarip,60 anyos,may kapikas ug nagpuyo sa maong lugar.
Miingon si Villanueva nga kanunay gagawas ang pangalan ni Sarip sa oras nga may mga madakpan sila nga drug pusher suspects.
Nakuha gikan kang Sarip ang balor 175-mil nga gitoohang shabu diin nagtimbang 35 gramos ug 9mm pistol nga walay papeles.
Samtang nakurat pag-ayo si Macabalan Brgy Kap Norbel Saa nga nagbaton sila’g suspected bigtime drug supplier nga residente sa ilang lugar.
Giangkon ni Saa nga kanunay niya makit-an ang suspek nga si Sarip sanglit may mga napalit kining pinuy-anan sa maong brgy.
Apan giangkon ni Saa nga wala siya’y kasayuran nga nalambigit diay si Sarip sa dinagko nga kalihukan sa illegal drug trade ilabina nga nagsilbi kining pari sa pagtoong Islam sa maong lugar.
Samtang giangkon sa bigtime suspected drug pusher nga si Sarip nga siya ang tag-iya sa 9mm pistol nga na embargo sa PDEA ug kapolisan sulod sa pinuy-anan niini.
Kini human gisilbi sa PDEA ug PNP ang search warrant batok kang Sarip kaganihang buntag.
Miingon si Sarip nga nanginabuhi kining normal pinaagi sa pagmaligya’g mga alahas sukwahi sa pasangil sa PDEA nga shabu ang negosyo niini.
Nasayran nga nakuha gikan sa suspek ang daghang salapi ug alahas ingon man ang 35 gramos nga shabu ug armas.
