Gipasalig ni Lead Prosecutor ug Batangas 2nd District Representative Gerville “Jinky Bitrics” Luistro nga magpadayon ang imbestigasyon sa mga opisyal sa Department of Education (DepEd) ug Office of the Vice President (OVP) nga nalambigit sa mga alegasyon sa sayop nga paggamit sa confidential funds ug bribery, bisan gibawi na ang tulo ka reklamo sa impeachment trial ni Vice President Sara Duterte.
Matud ni Luistro, giimbestigahan na sa Office of the Ombudsman gikan pa niadtong niadtong tuig sa 2024 ang mga alegasyon batok sa mga opisyal sa duha ka ahensya.
Dugang pa sa kongresista, mamahimo kining mosangpot sa kasong kriminal o sibil, depende sa mahimong resulta sa imbestigasyon.
Gipatin-aw ni Luistro nga ang pagbawi sa prosekusyon sa artikulo bahin sa confidential funds, bribery ug grave threats kay dili nagpasabot nga natapos na ang imbestigasyon ug gipasiugda niini nga walay nasayang sa prosesong gipahigayon sa Kamara.
Gipahayag usab sa kongresista nga andam ang prosekusyon nga itunol ngadto sa Ombudsman ang mga dokumento ug ebidensyang nakaplagan nila sa mga pagdungog sa Kamara ug impeachment proceedings aron makatabang sa nagpadayon nga imbestigasyon.
Samtang, gilahi usab ang pagdungog didto sa Quezon City Regional Trial Court bahin sa kasong grave threats kalabot sa mga pahayag sa Bise Presidente niadtong Nobyembre 2024 batok kang Presidente Ferdinand Marcos Jr. ug uban pang mga opisyal sa kagamhanan.
Dugtong niini, gipasiugda sa kongresista nga galaom silang tumanon sa Ombudsman ug uban pang mga ahensya ang ilang katungdanan aron matino kung dunay tulubagong kriminal o sibil ang mga nalambigit sa maong mga alegasyon. (raniel mahunyag)
