Duda si Board Member Pangky Acain nga adunay pipila ka mga personahe sa gobyerno nga posibleng naglikay o gipugngan sa pagtambong sa imbestigasyon bahin sa giingong illegal mining activities sa kabukiran sa Misamis Oriental.
Sa gipadayag sa Sangguniang Panlalawigan, ipadayon karong buntag ang hini-usang committee hearing sa Committee on Infrastructure ug Environment aron tukion ang reklamo kalabot sa maong ilegal nga kalihukan.
Subli nga ipatawag sa komite ang pipila ka kawani sa Misamis Oriental Provincial Government ug mga opisyal sa barangay nga giingong nahimutang sa lugar diin natabo ang illegal mining.
Apela ni Acain ngadto sa Provincial Administrator ug sa ubang kadagkuan sa Executive Department nga tugotan ug pasudlon ang ilang mga imbitadong personahe aron makatambong sa hearing ug makahatag og ilang pahayag.
Giingon usab sa board member nga adunay mga empleyado nga gakahadlok ug posibleng gadasig nga dili motambong sa pagdungog.
Una nang giimbestigahan sa komite ang giingong paggamit sa backhoe sa probinsya sa maong illegal mining activities sa kabukiran sa Initao ug Naawan.
