CAGAYAN DE ORO CITY – Mohimo sa subsob nga imbestigasyon ang kapitolyo-probinsyal kabahin sa nadiskobre nga mga dokumento nga iya sa kanhi administrasyon nga gipanglabay sulod sa bisinidad sa Misamis Oriental Provincial Jail sa Initao,Misamis Oriental.
Kini human nangunay sa pagdalikyat si Atty. Angel Lim,provincial legal officer ni Misamis Oriental Gov. Juliette Uy sa lokasyon diin nakit-an ang mga kadudahang mga papeles nga nakapangalan kang kanhi Gov. Peter Unabia.
Miingon si Lim nga accountable forms ang maong mga documeno ug dili unta kini basta-basta ipanglabay lamang nga walay igong basehan.
Sa pagkutlo ning balita, wala pa sila’y mga hukom kabahin sa hitabo apan nagpadayag kini sa dakong pagduda nga hayan adunay buot itago kung nganong gipalubong sulod sa maong prisohan ang mga dokumento.
Sa pikas bahin, tinguhaon usab sa Bombo Radyo nga madungog ang pag-esplikar sa kampo ni Unabia nunot sa maong kontrobersya.
