CAGAYAN DE ORO CITY – Walay legal nga basehan ang gobyerno sa Pilipinas aron dakpon si kanhi Pres Rodrigo Duterte ug paspas nga itugyan sa International Criminal Court o ICC sa The Hague,Netherlands.
Kini ang tipik sa preliminary findings sa Senate Committee on Foreign Relations ni Sen Imee Marcos nga nag-imbestigar nasaksihan sa katawhan nga pagdakop kang Duterte sulod sa eroplano sa Ninoy Aquino International Airport padulong sa Villamor Airbase aron sayon madala palupad sa ICC niadtong Marso 11 ning tuiga.
Miingon ang senadora nga infusion lang ang anaa sa International Police o Interpol ug dili red notice rason nga dakong illegal ang pagdakop kang Duterte.
Nasuta usab nga walay request ang ICC sa gobierno nga dalion ang pagdala kang Duterte padulong sa Netherlands rason nga dakong kuwestiyonable ang gihimo sa mga sakop ni Pres Bongbong Marcos.
Dugang sa magbabalaod nga sukwahi sa gisulti sa presidente nga dili motabang ang Pilipinas sa ICC apan nasaksihan sa publiko kung giunsa sa sakop administrasyon ang pagdumala aron mapasayon ang pagtugyan kang Duterte sa langyawng nasud.
Gibutyag usab niini nga giingong maniobra ni National Security Adviser Eduardo Año ang pagpadakop kang Duterte.
Lakip sa nadiskobrehan sa komitiba nga mani-obra lang aron tabunan sa DILG ang ubay-ubay’ng kasupakan sa balaod sa nahitabo sa kanhi presidente.
Kini ang rason nga kumbinsido ang presidential sister nga adunay dayag nga pagsupak sa batakang katungod ni Digong ang mga midakop kaniya.
Gani,wala moagi sa local court ang tanan nila nga proseso ayha unta dad-on sa ICC si Duterte.
Mitapos kini sa pag-ingon nga mohimo sila sa dugang imbetigasyon diin mag-depende sa mahuptang mga ebedensiya kalabot sa kontrobersya nga gilambigitan sa gobierno sa Pilipinas ngadto ika-16 nga pangulo nga si Duterte.
