“Politika lamang ug pag usik-usik sa panahon” — mao kini ang komento ni Atty. James Judith, kanhi konsehal sa Dakbayan sa Cagayan de Oro, sa kasamtangang dagan sa impeachment proceedings batok kang Vice President Sara Duterte, ilabina sa kahimtang sa nasud nga nag atubang og dagkong krisis.
Matod pa niya, samtang ang tibuok kalibutan naapektuhan sa ekonomiya ug nagkaguliyang sa daghang isyu, dili angay unahon ang mga proseso nga naggasto og oras ug atensyon sa Kongreso imbes nga magpokus sa krisis ug sa kalisod nga giatubang sa katawhan.
Dugang pa ni Judith, kon ang tumong gayud mao ang pagpanubag sa posibleng kalapasan sa balaod, mas angay nga ipasaka ang kaso sa hustong hukmanan diin adunay klarong pagdungog ug pagtubag sa mga alegasyon.
Para sa abogado, ang impeachment karon dili lang isyu sa balaod kondili klarong nagpakita nga ang politikal nga agenda ang nagdominar sa proseso imbes sa tinuod nga pagpanubag ug pagtutok sa panginahanglan sa katawhan.
