Gipasanginlan sa United People’s Initiative (UPI) ang kagamhanan sa paghimo og mga tinumotumo nga kaso batok kang Bise Presidente Sara Duterte aron mapugngan ang iyang kandidatura sa 2028.
Subay sa pamahayag sa ilang secretary general nga si Capt. Rey Valeros Jr., ang impeachment complaint batok sa bise presidente usa lamang ka pamaagi sa pag-persecute kaniya tungod kay nahibalo ang administrasyon nga dili sila makadaog batok sa bise presidente sa umaabot nga eleksyon.
Dugang pa ni Valeros, dili na unta kinahanglan pang dauton sa gobyerno ang bise presidente kung nagtuo pa sila nga patas ang ilang dagan sa politika.
Bisan pa sa mga lihok sa administrasyon sa paglimita sa mga alyado ni Duterte sa senado, gipasalig sa maong opisyal nga nagpadayon ang pagbantay sa katawhan sa dagan sa balaod sa nasud.
