Tungod kay pormal na nga nagsugod ang impeachment trial batok kang Bise Presidente Sara Duterte, gipasabot ni Atty. LJ Ramos sa Carrasco and Geñoso Law Office nga dili na kini mapahunong ug kinahanglan na nga tapuson ang tibuok proseso sa maong bista bisan unsa pa ang mahimong resulta niini.
Subay sa iyang pagtin-aw, gamiton sa Impeachment Court ang Subpoena Duces Tecum aron mandoan ang pagdala sa mga mahinungdanong files, samtang ang Subpoena Ad Testificandum magrequire sa mga indibidwal nga moatubang aron ipailalom sa eksaminasyon.
Importante nga bahin kini sa ligal nga proseso diin ang korte na mismo ang nagmando sa pagpresentar sa ebidensya ug mga testigo. Kini nga mga lakang nagpamatuod nga nagpadayon na gyud ang dagan sa bista ug hingpit na kining gisugdan ubos sa Konstitusyon.
