Gipamugos sa pundok sa Liberal Youth Northern Mindanao nga kinahanglan ipatuman ang constitutional process sa impeachment ni Vice President Sara Duterte nga walay bisan unsang babag o hunong sa maong proseso.
Namahayag si Andre Josol, Chairman sa maong grupo, nga dili lamang kini usa ka politikanhong lihok tungod kay tumong niini ang pagpresentar sa kamatuoran ngadto sa publiko aron sila mismo ang makahukom kon angay ba nga manubag ang bise presidente.
Tungod niini, gipadayag ni Josol nga angay gayod nga ipadayon ang impeachment trial aron makita sa katawhan ang tanang ebidensya.
Gihangop usab sa maong pundok ang pagpadala sa impeachment sa Senado ug hugot nga nagbarog alang sa hustisya ug katin-awan sa maong kaso.
