Pwedeng mapahunong ang impeachment trial batok kang Bise Presidente Sara Duterte kung modangop ang iyang kampo sa Supreme Court aron kuwestiyonon ang mga desisyon sa Senado sama na lang sa gidebatehang numero sa boto nga gikinahanglan para siya ma-convict, matod pa ni Atty. Oscar Moreno, kanhi mayor sa Cagayan de Oro ug magtutudlo sa balaod sa Xavier University.
Gitin-aw ni Moreno nga ang Senado walay kataposang awtoridad sa pag-interpret sa Konstitusyon, busa posibleng mopagawas ang Supreme Court og temporary restraining order kon dunay makitang legal nga bikil sa proseso.
Dugang pasidaan pa sa maong abogado nga kon mahitabo kini, maparalisa ang pagpadayon sa impeachment ug modagan ang panahon hangtod nga moabot ang tuig 2027 diin mosulod na ang nasod sa panahon sa eleksyon.
Subay niini, gipamahayag ni Moreno nga ang pag-file og petisyon sa labawng hukmanan kabahin na sa mga legal nga lakang nga mahimong buhaton sa depensa aron hagiton ang ruling sa impeachment court.
