Bisan pa nga wala sa opisyal nga agenda sa caucus o pagpulong ang paghisgut sa mga senador sa impeachment trial batok kang Bise Presidente Sara Duterte, giangkon ni Senate President Francis “Chiz” Escudero nga posible gihapon kining matuki sa impormal nga diskusyon sa mga miyembro sa Senado.
Siya miingon nga ang desisyon kung ipadayon ba o dili ang hearing wala nakadepende sa usa ka tawo lamang, apan sa kolektibong boto sa tanang senador isip usa ka “deliberative body”.
Gibutyag ni Escudero nga ang Senado magapadayon sa proseso subay sa balaod ug sa desisyon sa Korte Suprema nga nagdeklarar nga dili balido ang Articles of Impeachment tungod sa paglapas sa one-year bar rule sa Konstitusyon.
Apan, giila usab niya nga ang Senado adunay katungod nga maghisgot sa maong isyu isip legislative body, ug ang mga senador magbotar kung unsaon pagpadayon ang kaso sulod sa balangkas sa ilang internal nga mga lagda.
Nabalaka si Escudero sa posibleng sangputanan sa isyu-legal sa impeachment kay pwede kining mulanding sa “contitutional crisis” ug mahimong “Banana Republic” ang Pilipinas.
