Gipasiugda sa City Health Department ang importansya sa panaghiusa sa magtiayun sa pagpili sa family planning methods atol sa nagpadayong kampanya sa 18-Day to End Violence Against Women. Sumala ni Lorraine G. Junco-Nery, RN, MD, MHA sa City Health Department Cagayan de Oro, ang pag-avail sa family planning kinahanglan nga napadayon nga sabotan sa duha ka partido ug dili lang ikonsiderar ang desisyon ni misis. Butyag ni Nery nga pinaagi sa counseling, gipasabot sa mga health workers sa magtiayun ang nagkalain-laing metodo nga puwede nilang gamiton, lakip ang mga benepisyo, risgo ug implikasyon sa matag pamaagi. Gipunting ni Nery nga kung ang desisyon sa pagpili sa family planning mahimong hinungdan sa panaglalis o makahatod sa pisikal ug sikolohikal nga pag-abuso, kini mahimong sakop na sa kaso sa Violence Against Women o VAW. Nagtuo si Nery nga kon mag-uban ug magpakabana ang duha ka partido sa pag-attend sa counseling, mas dako ang tsansa nga masabtan nila ang kahinungdanon sa family planning alang sa tukmang pagplano sa ilang pamilya.
