Gikasubo sa pundok sa mga magtutudlo ang nahitabong shooting incident sa usa ka pampublikong tunghaan sa Tacloban City nga nakakalas og 4 ka kinabuhi samtang naka-angol og ubay-ubay ka mga tinun-an.
Namahayag si Roland S. Cruz, coordinator sa Alliance of Concerned Teachers (ACT) Northern Mindanao, nga alang kanila ang maong insidente usa ka resulta sa krisis sa edukasyon sa nasud.
Bisan pa niini, gipunting ni Cruz nga mamahimong malikayan ang susamang trahedya kon hatagan og igong pundo ang sektor sa edukasyon ug matagad ang problema sa overcrowding sa mga classroom.
Subay sa datus gikan sa Second Congressional Commission on Education, daghan matod pang mga tinun-an ang nagtaho na sa mga insidente sa bullying, intimidation, ug harassment tungod sa mga disorderly classes.
Tungod niini, nanawagan ang grupo og dinalian nga aksyon gikan sa administrasyon aron masiguro ang kaluwasan sa mga bata sulod sa ilang mga tunghaan.
