MANILA – Nangayo’g pasaylo ang inahan nga si Angelika Yulo ngadto sa iyang anak nga si Paris Olympics double gold medalist Carlos ‘Caloy’ Yulo ug ngadto sa hinigugma niini nga si Filipino-Australian Chloe San Jose pinaagi sa press conference sa kauluhan kaganihang buntag.
Kini isip tubag sa sobra 7 minutos nga katin-awan nga gilugwa ni Caloy ug Chloe kabahin sa isyung pinansyal nga gihisgot sa iyang inahan sa trending interview sa Bombo Radyo sa miaging adlaw’ng Domingo sa buntag.
Namahayag si Gng. Yulo nga tawo lang kini ug dili perpekto usab nga anak si Caloy rason nga angay sila nga magkahusay nga walay labot ang ubang mga tawo.
Dugang niini nga unta masabtan sa iyang anak kon unsa man ang nasulti niya sa unang interbyu sa Bombo Radyo kay nabilar kini sa pagtan-aw sa Paris Olympics diin nasakmit ang unang medalyang bulawan.
Mihangyo usab si Gng Yulo sa katawhan nga unta dili na padak-on ang internal family misunderstanding kay aron mas ma-pokus na ang atensyon sa selebrasyon sa dungog nga nahatag ni Caloy sa Pilipinas sa kasamtangan pang Paris Olympics.
Mitapos kini sa pagtimbaya kang Carlos ug namahayag nga nalipay pag-ayo ang ilang pamilya sa kalampusan niini sa Olympiada.
