“Karma nila!” mao kini ang paghulagway ni Naneth Castillo, inahan sa usa ka biktima sa extrajudicial killing (EJK) sa drug war sa administrasyong Duterte.
Namahayag si Castillo sa Bombo Radyo nga dako ang ilang kalipay nga mipanig kanila ang kamatooran, ang balaod ug ang Dios.
Iyang gibutyag nga nagtuo sila nga kini na ang adlaw sa mga kaalyado ni Duterte nga mipatuman sa kampanya nga mikutlo og daghang inosente nga kinabuhi, ug karon sila na usab ang mapapanubag sa balaod.
Dugang pa niya, kung kaniadto ang mga biktima maoy nasilutan, karon na ang panahon nga mabalikan sila sa karma sa ilang gibuhat.
Apan nagtuo si Castillo nga mas angay magpasalamat ang mga co-perpetrators ni Duterte kay swerte gihapon sila nga muagi sa due process, kompara sa mga gipangpatay nga walay kalaban-laban ug hangtod karon wala pa makakuha sa hustisya.
