Gikataw-an na lamang ni Naneth Castillo, inahan sa usa ka biktima sa extrajudicial killing (EJK), ang pagkahadlok ni Senador Ronald “Bato” dela Rosa human gilakag siya sa warrant of arrest gikan sa International Criminal Court (ICC).
Matod ni Castillo, kaniadto maisog kaayo si dela Rosa sa panahon sa drug war ug bisan sa dihang nadakpan si kanhi Presidente Rodrigo Duterte, padayon kining nagpakita og kaisog pinaagi sa iyang mga pahayag nga andam siyang moatubang sa ICC.
Apan sumala niya, lahi na karon ang dagan sa mga panghitabo tungod kay nakita na lamang nga naglikay ug dili gusto magpaaresto ang senador.
Dugang pa niya, makaluluoy ug makaulaw tan-awon nga usa ka kanhing PNP chief ug kasamtangang senador ang nahadlok sa pag-atubang sa kaso.
Giingon usab sa inahan sa EJK victim nga dili maayong ehemplo alang sa kapulisan ang maong lihok ni dela Rosa, ilabi na nga kaniadto kusog kini mangdasig ug manghambog batok sa ICC.
