CAGAYAN DE ORO CITY – Nag-unong sa masakit nga kamatayon ang mag-inahan nga sakay sa motorsiklo human nabanggaan sa sports car samtang managsama nga kusog ang ilang mga dagan sa Masterson Avenue,Zone 11,Upper Carmen ning syudad.
Kini human kompirmaha ni COCPO traffic investigator Police Corporal Maximo Judaya nga wala na matabang sa mga doktor sa Northern Mindanao Medical Center ang anak nga si Rodana Mabaylo tungod sa naangkong mga bun-og ug samad sa kalawasan gumikan sa maong aksidente.
Miingon si Judaya nga mismo ang driver sa sports car nga si Louie Amodong ang mikawat sa lane nga gisubay ni Rodana diin nakaangkas ang iyang inahan nga si Analy Mabaylo hinungdan sa dugu-ong hitabo kagahapon sayo sa buntag.
Hinoon,wala dagani sa suspek ang hitabo ug nagpa-kustodiya kini sa kapolisan pipila ka minutos gikan sa hitabo.
Samtang masuta karong adlawa kon dunay makab-ot nga panagsabot sa duha ka panig o hingpit masang-at ang kasong kriminal batok sa sports car driver nga nakaligis-patay sa mag-inahan sa Upper Carmen ning syudad.
Kini bisan kon may pag-uyon na ang inahan ni Analy Mabaylo nga andam siya makig-ammicable settlement ngadto sa suspek aron paspas mahiluna ang patay’ng lawas sa mga biktima.
Apan miingon si Judaya nga agdon pa ang laing 13 ka igsoon ni Gng Analy kon mo-uyon ba sila sa sudlan nga kasabutan o moduso’g kaso.
Una nang nakaandam ang PNP nga mosang-at sa kasong reckless imprudence resulting to double homicide ug damage to property kon walay makab-ot nga kasabutan ning adlawa.
