CAGAYAN DE ORO CITY- Gibulgar sa Criminal Investigation and Detection Group o CIDG-MisOr team nga dugay na nilang gimonitor ang pagbaton sa illegal nga armas sa pamilyang Salvaleon diha sa Brgy Malagana, Claveria Misamis Oriental.
Sumala ni CIDG MisOr team operative Police Executive Master Sgt Noel Oclarit nga daghan nang mga personalidad ang nagsumbong sa ilang buhatan kalabot na sa gibatonan nga mga armas nila ni Gertrudes,66 anyos ug Reagan Salvaleon,36 anyos subay sa gilugwa sa korte nga search warrant tungod sa pagbaton s mga armas.
Gisikop usab ang ilang security escorts nga si Mario Pagara,49 anyos ug Christopher Pagara,39 anyos atol sa maong operasyon.
Gidala usab sa CIDG ang unom ka Cafgu kuyog sa ilang mga armas sila si Joselito Cabaluna, 29 sa Brgy Tipolohon; Richie Taquin,39, Ramie Bacala, 40;Roger Cailing, 49, nga pulos taga- Brgy Malagana ug Ricardo Sumilla, 60, gikan sa Aposkahoy ug Ernesto Ayumon, 33 nga residente sa Poblacion sa maong lungsod aron imbestigaran.
Kabahin sa mga armas nga nakompiskar ang tulo ka kalibre nga 45;duha ka M14 rifles;4 ka M-16 rifles ug KG9 submachine gun ug libuan ka lain-laing klase s mga bala sulod sa compound sa pamilyang Salvaleon.
Samtang giangkon ni Abrogar nga naghatag proteksyon kanila ang CAA nga ubos sa 58th IB,Philippine Army sa pinuy-anan sa iyang inahan ug igsoon sa Brgy Malagana,Claveria,Misamis Oriental.
Kini human unang gisikop sa CIDG-Misamis Oriental Team ang inahan ni Abrogar nga si Gertrudes,66 ug iyang igsoong lalaki nga si Reagan Salvaleon,36 tungod sa pasangil nga nagbaton sa mga armas.
Miingon si Abrograr nga nakapangayo sila’g proteksyon sa militar tungod sa giingong bahad sa residente nga si Jaime Cawasan nga sila pamatyon gumikan sa bangi sa yuta.
Mag-atubang sa kasong illegal possession of firearms ug kasupakan sa Comelec gun ban ang pamilyang Salvaleon ug magsoong Pagara tungod sa maong pasangil batok kanila.
Samtang naghatag lamang sa security back-up ang presensiya sa CAA sa pamilyang Salvaleon.
Kini ang konplikto nga pahayag ni 58th IB commander Lt Col Roy Anthony Derilo sa unang pahayag ni Abrogar nga gihatagan sila’g proteksyon sa Cafgu aron dili mamiligro ang ilang kinabuhi.
Gihimakak ni Derilo nga gihimong pribado ang serbisyo sa maong mga CAA members bisan nasapon sa CIDG-MisOr team sulod sa mismong compound sa pamilyang Salvaleon dihang gisilbi ang search warrant gikan sa korte sa miaging kadlawon.
