CAGAYAN DE ORO CITY – Nangayo’g tabang sa Bombo Radyo ang inahan sa gitudlong suspek sa pagpatay kang RTA enforcer Mark Langam IV.
Kini dihang mibati na’g kabalaka sa ilang seguridad si Elizabeth Rayon, inahan ni John Mark Rayon ug kaipon niini nga si Ana Nala.
Gibulgar ni Rayon nga nakadawat na sila’g mga bahad sa kinabuhi ug gidid-an na sila sa mga pulis nga magpa-interview sa media.
Apan bisan niini, gipanganti ni Rayon nga dili siya mahadlok nga magsumbong kang PRO-10 regional director Brig Gen Rolando Anduyan kon kinsa ang mga pulis nga nanghinadlok ug nagpasangil sa iyang anak nga maoy suspek sa kasong pagpatay.
Samtang mibati na usab sa kahadlok ang kaipon ni Rayon nga si Ana Nala nga moggawas sa ilang panimalay.
Kini tungod sa mga bahad sa kinabuhi nga giingong iyang nadawatan gikan sa pipila ka mga operatiba sa Puerto Police Station.
Si Nala miingon nga kaya niya nga itudlo kang PRO-10 regional director Brig Gen Rolando Anduyan ang mga pulis nga nagbutyag kaniya nga ipaangkon sa iyang kaipon ang kasong pagpatay sa RTA enforcer nga si Langam.
Una nang giangkon ni Nala nga iyang gireklamo’g abandonment ang iyang kaipon apan wala siya magdahom nga mapasanginlan kini sa paghimo’g krimen.
