Adunay pagsaka sa inflation rate sa Northern Mindanao sumala ni Apple Sweet Cempron-Libre, Statistical Specialist II, base sa datos sa PSA.
Matod niya ang inflation rate sa Marso 2026 misaka sa 4.6 porsyento gikan sa 2.3 porsyento sa Pebrero 2026 ug 0.1 porsyento sa samang bulan niadtong 2025, diin dakong hinungdan ang sektor sa transportasyon.
Giingon niya nga nisaka usab sa 13.8 porsyento ang transport inflation tungod sa kamahal sa gasolina ug pagsaka sa plite sa yuta, tubig, ug panghimpapawid nga byahe.
Dugang pa niya, naapektuhan usab ang presyo sa pagkaon ug ilimnong walay alkohol nga misaka sa 3.2 porsyento, ilabi na sa bugas, kamatis, uban pang utanon, ug isda sama sa tamban.
Busa, gipadayag ni Cempron-Libre nga ang mahal nga gasto sa pagdala sa produkto gikan sa uma ngadto sa merkado maoy dakong nakaduso sa pagsaka sa presyo sa mga palaliton sa rehiyon.
