CAGAYAN DE ORO CITY- Gipasigarbo ni Ozamiz City Police Dir PCInsp Jovie Espenido atubangan sa kapin gatus ka mga residente nga mitambong sa inter-faith prayer rally atubangan sa City Hall ang kalampusan sa iyang misyon sa kampaniya batok sa illegal nga droga.
Kini nunot na sa kamatayon ni Mayor Aldong Parojinog Sr. Si Espenido miingon nga napamatud-an na niya nga dili tinood ang panultihon nga “ANG MGA MASASAMANG TAO, MATAGAL MAMATAY” tungod sa nahitabo sa mga Parojinog.
Gipanganti niini nga kon siya ang mohimo’g operasyon batok sa mga dautang elemento,dili na niya dugayon.
Giawhag ni Espenido ang mga residente sa Ozamiz City nga dili na angayang kahadlukan ang Barangay San Roque Lawis.
Siya miingon nga wala na’y kontrol ang mga Parojinog sa maong lugar ilabina nga namatay na ang mayor ug nabilanggo na usab ang Vice Mayor Nova Princess Parojinog.
Ang Lawis ang gikahadlukan nga lugar sa Ozamiz tungod kay mao kini ang taguanan sa mga kriminal ug naghitak usab ang ilegal nga droga.
Naglaraw si Espenido nga sunod magpa-assign sa lugar nga daghan ang “satanas”.
Kini sa tumong nga iyang mapitol ang kahiwian nga mga binuhatan niini.
Apan gitin-aw ni Espenido nga iya na lamang isalig sa atong Labaw’ng Makakagahum ug kang PNP chief Gen Ronald de la Rosa kon asa siya gusto ibutang niini.
Maoy gipasalig sa opisyal nga iya gayud himoon ang committment sa iyang trabaho. Dugtong niini,nalipay ang usa ka residente sa Ozamiz City sa gidangatan sa pamilyang Parojinog.
Sumala ni Belen Rama nga tungod sa kamatayon ni Mayor Aldong ug pagkabilanggo ni Parojinog,malaumon sila nga maangkon na nila ang tinood nga kalinaw sa ilang lugar.
Siya miingon nga wala nay maghari-hari sa ilang lugar ug hinay-hinay na usab nga nawala ang ilang mga kahadlok.
Hisayran nga gatusan ka mga residente ang nagpahigayon og prayer rally atubangan sa City Hall diin nagdala sa banner nga “Justice has been served”, We are Free” ug “We Love Espenido”.
