(Update) CAGAYAN DE ORO CITY – Gipangitaan sa regular board of directors sa Cagayan de Oro City Water District (COWD) sa ‘black and white’ copy sa unom ka bulan nga extension gikan sa Local Water Utilities Administration (LWUA) ang interim management nga natahasan sa full intervention sa internal operations sa sistemang panubig sa dakbayan.
Kini human pahupasay na ang unang extension nga gihatag sa LWUA board of trustees sa interim COWD board of directors ug management mismo ning adlawa.
Nangulo sa pagdalikyat sa buhatan ni interim COWD General Manager Fermin Jarales aron makapangayo’g kopya sa maong extension si regular BOD member Dr. Gerry Caño kuyog sa pipila ka kauban kaganihang buntag.
Gipasabot ni Caño nga gusto nila makakuha sa kopya sa gisulti ni Jarales aron mahingpit ang ilang pagtoo nga tinood ang giingong 6-months extension sa interim COWD mngt.
Apan sumala niini nga wala pa’y mahatag nga kopya si Jarales kay mahidangat personal gikan sa kauluhan padulong sa COWD ang legal counsels sa LWUA ug representante sa Office of the Government Corporate Counsel alang maong hisgutanan.
Hinoon,walay tensyon tali sa duha ka grupo kay nakaplastar nang daan ang tropa sa Cogon Police Station ug mga sakop sa sundalo nga ubos sa Task Force Oro sa bisinidad sa COWD.
Nanganti pagbalik ang grupo sa regular COWD BODs karong hapon aron singlon ang gisulti ni Jarales nga kopya sa extension sa interim mngt ug ang pakighimamat sa mga sakop sa LWUA ug OGCC.
Hisayrang nalatid usab sa official Facebook page sa COWD diin nagsaysay nga nauyunan sa LWUA board of trustees meeting nga gihataga’g dugang unom ka bulan ang interim BODs ug management nga ipadayon ang full takeover sa internal affairs niini.
