CAGAYAN DE ORO CITY – Nanganti ang grupong Bantay Tubig Movement nga ipalayas na nila ang interim general manager ug board of directors nga mga tinudlo sa Local Water Utilities Administration o LWUA diha sa Cagayan de Oro Water District o COWD ning syudad.
Miingon si Eric Salcedo,convenor sa grupo nga angay lang manglayas na kining mga tawhana kay nagdala lang sa kagubot sa operasyon sa COWD.
Kini ang rason nga mohimo’g pagdasmag ang grupo sa COWD aron dili na pasudlon ang interim officials isip tubag sa cease and desist order nga gipakang batok kang Engr Antonio Young.
Gibutyag ni Salcedo nga mas maayo nga manguli kini sa laing lugar ang maong tawo kay dili sila taga- Cagayan de Oro.
Dismayado usab sila kay wala pabori ang petition nga pirmado sa mga tawo aron dunay usbon sa kontratang panubig tali sa COWD ug Cagayan de Oro Bulk Water Incorporated.
Kini ang tipik sa rason nga sobra pa sa lihok-protesta ang buhaton nila batok sa interim officials.
Dumduman nga tipik sa mga grupo nga nakigtagbo kang interim COWD General Manager Fermin Jarales kay konohay motabang pagsulbad suliran sa panubig sa syudad.
Apan sulti sa mga kritiko usab ning grupuha nga misakay lang sa panahon si Salcedo kay nag-interest kini nga modagan pagbalik pagka-konsehal sa segundo distrito sa dakbayan.
Samtang namugos ang grupo nga tinud-anay nga pagpakabana ang ilang gihimo sa katawhan hinungdang dili angay hataga’g malisya.
.
