Gipadayag ni Professor Jestoni Babia, LPT, MAEd, EdD ug presidente sa City College of Cagayan de Oro, nga nagkakusog ang direksyon sa mga unibersidad ug kolehiyo sa Pilipinas padulong sa internationalization sa ilang mga programa.
Matud sa propesor, kabahin niini ang pag-apil sa mga accreditation systems sama sa ASEAN Quality Assurance diin gi-evaluate ang curriculum sa mga eskwelahan pinaagi sa international standards.
Dugang pa niya nga samtang gi-uyonan sa ubang foreign evaluators ang competency-based outcomes sa mga programa, adunay kabalaka ang mga humanities professors kung angay bang tangtangon ang ubang general education subjects sa kolehiyo bisan pa og kabahin kini sa national identity sa usa ka Pilipino.
Gipasabot usab ni Babia nga importante ang pagpreserbar sa mga subject sama sa Rizal ug ubang humanities courses kay kini konektado sa kasaysayan ug legal nga pundasyon sa nasod nga dili angay ipasalikway.
Busa giingon niya nga kinahanglan mahatagan og balanse ang international standards ug ang pagpabilin sa national identity pinaagi sa mas lapad ug konsultatibong pagdesisyon sa mga polisiya sa edukasyon.
