CAGAYAN DE ORO CITY-Nagpatabang sa National Bureau of Investigation o NBI-10 ang pipila sa 100 ka propesyonal nga nailad sa usa ka travel and tour scam dinhi sa rehiyon.
Sumala sa wala magpaila nga negosyante nga taga- Cebu City,anaa sa P23- milyon nga investment capital ang nakuha gikan kaniya human gilayasan sa tag-iya sa FNF Travel and Tours nga si Frederick Valdez nga taga Iligan City.
Kuyog sa maong negosyante sa pagreklamo sa NBI ang 10 ka magtutudlo sa Misamis Oriental.
Gibutyag sa mga reklamante nga anaa sa 300 milyon pesos nga investment nga gusto nila makuha’g balik gikan kang Valdez ug Fredrich Maguiran nga nagtagu-tago na ning panahona.
Samtang gikumpirmar ni National Bureau of Investigation o NBI regional director Atty Pipo Bernales nga gisugdan na nila ang pag-imbestigar ug pagtigom ang ebidensya batok sa FNF Travel and Tours nga gipadagan ni Frederick Valdez.
Si Bernales miingon nga naalarma siya tungod sa kadaghan sa mga negosyante nga nabiktima sa travel and tour scam.
Apan mihangyo si Bernales sa grupo sa media nga himoon nilang pribado ang pag-imbestigar sa maong alegasyon ilabina nga may sundon sila nga proseso.
Gipahimangnuan usab ni Bernales ang publiko nga dili dali motoo sa mga investment scheme.
Sumala ni Bernales nga maayo bantayan sa publiko ang mga investment scheme nga nagtanyag sa taas nga interest nga mabalik nga kwarta gikan sa ilang puhunan.
Asoy pa niini nga kinahanglang hunahunaon sa pag-ayo ang sudlan nga negosyo ayha mopaggawas sa puhunan aron dili mailad.
Hisayran nga ubay-ubay na ang nailad sa mga investment scam sa tibook rehiyon.
