CAGAYAN DE ORO CITY – Gimatud-an sa Indigenous Peoples Community ang ilang hugot nga suporta sa gobierno diin una nila gideklara nga persona non grata sa laing higayon ang gitawag sa militar nga Communist Terrorist Group (CTG) nga naglihok sa Misamis Oriental.
Kini human isulti sa IP members ang lokasyon diin nakalubong ang kalibre AK-47 rifle ug improvised explosive device (IED) nga nagamit nila sa pakigsangka batok sa tropa sa gobierno sa miaging panahon.
Matud ni 58th Infantry Batallion commander Lt Col. Leoncito Grezula Jr nga dayag kini nga pagbarog sa IP community aron barugan nila ang ilang pagsalikway sa mga aktibo pang CTGs ubos sa esteng bahin sa lalawigan.
Siya miingon nga maoy nangulo sa paghaw-as sa ‘arms cache’ sa CTGs ang bag-ong naporma nga Balatukan Hunters of Charlie Company ubos sa 58th IB.
Dumduman nga sa miaging semana, mipirma ang halos 80 ka IP leaders aron isalikway ang kalihukan sa CTGs nga dugay’ng naglihok sa lalawigan.
Hisayrang kusog ang kalihukan sa armadong grupo sa Sitio Lantad,Brgy Kibanban,Balingasag kaniadto diin nakaporma pa sila’g ‘shadow government’ kay napasagdan sa kagamhanan sa taas nga panahon.
