Nanimalos ang Iran human upat ka adlaw nga pag-atake sa Israeli Defense Force (IDF) ug tropa sa Amerika sa ilang military ug nuclear sites.
Kagahapon, kapin 20 ka tawo ang natalang patay sa lima ka mga lugar nga gipaluparan sa missile sa Islamic Revolutionary Guard Corps (IRGC) Fattah Missiles o mas naila isip hypersonic ballistic missiles, ug ang Kheibar Shekan missile – usa ka long-range solid-fuel ballistic missile nga ang paglupad musukod sa gilay-on ang 1,450 kilometros.
Nagbaton kini sa satellite-guided warhead ug taas nga maneuverability.
Kini nagpasabot nga dali kining makalusot sa mga radar ug air defense systems sama sa Iron Dome sa Israel.
Kagahapon, gipalupad na sa Iran ang Sejjil-1 missiles– usa ka solid-fuel missile nga adunay gilay-ong 2,000 kilometros ang paglupad.
Subay sa report, anaa sa 20 ka tawo ang patay sa atake sa Tel Aviv, diin naapektohan ang Bnei Brak ug Bat Yam.
Sa maong syudad daghang mga residential buildings ang nahugno ug lakip niini ang U.S. Embassy. Sa Holon, nangaliki ang mga apartment buildings ug daghang residente ang samaran.
Ang syudad sa Ramat Gan nagreport sa grabe nga kadaot sa mga high-rise buildings.
Sa syudad sa Beersheba nadaot ang Soroka Medical Center, kinsa giila nga pinakadakong ospital sa habagatan sa Israel, kundiin aduna pay video footage ang direktang pag-igo sa missile sa Iran sa dakung pasilidad.
Samtang didto sa Rehovot, usa sa mga missiles ang misangko sa research center sa Weizmann Institute of Science, nga nagbilin sa dako nga kadaot sa imprastruktura.
Human sa atake, mihulga pa si Irans Supreme Leader Ayatollah Khamenei sa mas dakung gubat kung ipadyon sa Israel ug Amerika ang pagsinamok sa ilang hapsay nga aktibidad sulod sa ilang nuclear facilities
